જલાલ મસ્તાન ‘જલાલ’

ગઝલમાં જે નીકળી હ્રદયની જ વાતો-

હતી એ અસલમાં પ્રલયની જ વાતો.

 

ગુજરતાં ડરું છું હવે એ સ્થળોથી-

કરી આપણે જ્યાં ઉભયની જ વાતો.

 

વિરહમાં દશા દુર્દશા થઈ ગઈ છે,

હવે હું કરું છું સમયની જ વાતો.

 

સુરા ભાન મારું  ન છિનવી શકે છે!

પીને પણ કરું છું વિનયની જ વાતો.

 

હું હાર્યો છું દિલ તે નથી કોઈ જોતું,

બધે થઈ રહી છે વિજયની જ વાતો! 

 

‘જલાલ’ આ ગઝલમાં બીજું તો હતું શું?

કરી છે તમે બસ, પ્રણયની જ વાતો. (૨૦૦૨)

                     (‘ખૅરિયત’ પાનઃ ૧૧૮)