જલાલ મસ્તાન ‘જલાલ’

પ્રેમમાં હું એમ પસ્તાયો હતો,

જાણે કોઈ માર્ગ વિસરાયો હતો.

 

જ્યાં ને ત્યાં જે ખૂબ પછડાયો હતો-

એ જ માણસ ખૂબ વખણાયો હતો.

 

કોઈ હલ એને હતો નહીં તે છતાં-

પ્રશ્ન મારો ખૂબ ચર્ચાયો હતો.

 

જે નિહાળીને તમે ભાંગી પડ્યા-

મારાં દુઃખનો માત્ર પડછાયો હતો.

 

એય પહેલાંનાં સમાં નહોતાં રહ્યાં,

હુંય થોડો કંઈક બદલાયો હતો.

 

ઘેર જઈને એ રડ્યાં રાતે ‘જલાલ’,

  મોડેમોડે શેર સમજાયો હતો. (૨૦૦૧)

 

-જલાલ મસ્તાન ‘જલાલ’

‘ખૅરિયત’માં પાનઃ ૧૦૨.